2019新春惠東雙月灣遊

（05-02-19 至 07-02-19）

 

大年初一

早,先從香港過關到福田口岸，於關口大富之家茶餐廳集合,集齊所有親友,再去水圍附近搵旅遊車,因為關口唔俾停..,先開車到東莞鳳崗龍福花園參觀,再到工廠取物資-燒烤食用品,海鮮包括有，蝦蟹蠔蚌...,然後就開車去惠東雙月灣,中途系選寮鎮食個窯雞午飯,仲多買四隻預備今晚食,食完個午飯，就去萬科度假村我哋要入住嘅雙楝式兩層別墅合共有四廳兩廚八房十張雙人床,足夠我哋一行人14人住,我哋會喺度住3日兩夜,到達別墅放底所有行李物資先參觀屋裏面,都好大都唔錯,外邊感覺環境優美又鄰近海灘,因為冬天海灘遊人唔多,但就見有啲人開沙灘車玩..,分配好房間後,就開車到港口鎮燒烤超級市場買補給品,再到煙花店買煙花預備今晚燒,時間都唔早,買好後，就返別墅,剛到別墅，就正好係日落時候,系別墅影嚇日落,再預備今晚燒嘢食打邊爐,有啲睇電視，有啲打麻雀,我哋有幾條友去到海灘同別墅之間有一條小路,呢度有啲共享電單車,我哋就玩咗大約半個鐘頭,到七點鐘左右就開始我哋今日嘅晚餐,面對海灘位置有好多人燒煙花,我哋一邊燒野食一邊打邊爐，再欣賞人哋放嘅煙花,別墅嘅位置欣賞煙花十分之正,慢慢食到十點鐘左右就行出去海灘，玩我哋今日買嘅煙花,感受一下過年嘅氣氛,燒完煙花就返別墅瞓覺.

 

年初二

早,因為係輕鬆遊,九點半先集合,再出發去港口鎮搵早餐食,本想搵個港式茶餐廳食早餐,但係好幾間都係開11點,所以隨便搵左一間普通店食早餐點心,隨後就會去我哋嘅第一個景點平海古城,到達平海古城西門,開始入去參觀,呢度有東西南北門,中間十字街,感覺祇有西門城樓最好,因東南北門太近民居,行入街裏邊參觀，都有好多各家嘅祠堂,好快就行完呢個平海古城,之後就去我哋另一個景點，海龜自然保護區,到保護區前上山路徑,因保護區太多車,就要在路徑口等待放車,等到差唔多45分鐘先能夠開車上去,到達門口即刻買入場券入場,入到場後先去科普館參觀一下海龜標本,但保育區無開,所以好快就睇完,之後行左去一個觀景台位置,呢個觀景台就係之前颱風杜鵑直接登陸地方,睇完之後就去海龜館,不過要行一條好長嘅斜路落去,大約都有一公里先至行到館,到館前見到好多人喺度排隊,原來好多參觀旅客都係坐觀光車返門口,因為行返上去都幾係野.....到館外,先見到一個水池，池水唔係太乾淨,再行落去樓下入館裏邊，先至見到啲休閒嘅海龜,好快睇完海龜，喺館出邊有個石灘,欣賞下海景,之後再去番排隊處等車返大門口,要畀現金十文一個人先至可以坐,又等左差唔多45分鐘,先至可以坐到返大門口,呢個時候已經差唔多四點鐘,本來想去雙月灣觀景點欣賞兩邊灣影下相，放嚇無人機,因唔比車上,要行差唔多兩公里,所以決定取消,我哋連下午飯都未食,就即刻開車返港口鎮，搵左間叫新輝茶餐廳食下午茶當午餐,食完午餐在附近行下,又再買下補品預備今晚又打邊爐同燒嘢食晚飯...返到別墅,有啲人打麻雀睇電視,我哋有六七個人又去開共享電單車,一邊開車一邊欣賞煙花,一樂也,玩完就返別墅開餐,跟琴晚一樣,但就唔使再去海灘燒煙花,可以直接喺度睇人地放嘅煙花.....12點幾就上床瞓覺.

 

年初三

因為尋日去嗰間新輝茶餐廳食嘅港式食物都幾好,所以大家就決定十點半先至集合,集合前checkout,之後再去食早餐,因為間餐廳係開11點.食到差唔多12點幾,就開車返東莞龍福花園,中途比較塞車,返到東莞都差唔多三點幾，卸返低之前嘅物資,本來諗住先去按摩之後先至返深圳食晚餐,因時間唔夠,系龍福花園吹水一下,吹到四點半就出發返深圳,途中交通非常暢順,唔使45分鐘就已經到達深圳金光華商場,我哋會喺呢個商場嘅三千日本料理食自助餐晚飯,食到好飽,九點幾就開始返香港去.....

 

今次嘅旅程,最正嘅就係別墅,因為可以成班人一齊休閑慢慢燒嘢食又打邊爐,欣賞無限煙花,睇幾個鐘頭嘅煙花,夠曬本😁